ابو ذيه غزل

الشمس كلي يصاحب شعلة منهة
و ترى وجنة حبيبي شعلة منهة
ثاري العين تكره شعلة منهة
مثل ما تكره الروح المنية

مثل جنح الفراشه شفاك ورقه
و ربيع الشوك منك راد ورقه
كل بوسه حبيبي اطيك ورقه
و اذا حلك ابحلك دفتر هديه

طار و ما كلت للناس عالطار
و شسولف عالجرح بالكلب عالطار
جنت وياك شايل خلك عطار
طفل ما تشتري و تلعب عليه

غزل عينك رهن روحي و جرهه
و شعل نيران لبكلبي و جرهه
اريد ابوسك من شفتك و جرهه
حتى انقل هموم البيك اليه

سكر كأس الخمر من ضاك نفسك
و اكو غيرك حلو بس ماكو نفسك
اريدك يا حبيبي اتبوس نفسك
بس ابداخلك تنويها اليه

أحب التين و المنجا و لكنار
و حبك صار في قلبي و لك نار
الله إلإ خلق جنة و خلق نار
خلقك مثل القمر تضوي علية

نحبه و ما كعد وياه حظنه
و جني من الدفو حسيت حظنه
انه ما ريد طمع بس ردت حظنه
بس من الحظنه شيفكه من اديه

أفز من يكبل وليفي و افر بيه
و اشبكه و من فرحتي أركص وافر بيه
أذا بالشته و جو بارد وافر بيه
أحس تموز حضنه يصير اليه.

و شاهد أيضاً شعر شعبي عراقي حب وغزل وروائع عراقية رومانسية.
اشعار حب و غزل شعبي مكتوبة

تعال اكرب حبيبي (مالي غيرك)
و انا أدري بجمالك (مالي غيرك)
مال تروح مني (مال اغيرك)
سولفهه اعله روحك مو عليه

سفن حبك بشواطي الروح *شرعا*
و سهم حبك نبت بحشاي *شرعا*
و ردت مذهب يحلل البوسات *شرعا*
و أذا ماكو …. اردن للجاهليه

له الكون يا مدرك يا مهلك
و كالو كون اليحبك يمهلك
آنه تمنيت بيت اهلي يم اهلك
و كلبي و كلبك يصيرن سويه

احبك من صغر عودي وسني
و من حبك سقط شعري وسني
و على حالي بجه شيعي وسني
و ثالثهم مسيحي يون عليه

شلون تخون و انته حلفت بايات
مزلاكه طلعت مو درج بايات
تريد تروح مو بس باي بايات
و اليرجع الف نعله على ابيه

ريد اغفى على ذراعك و انامن
كضينه الحب تمن انت و انامن
و حك عيناك نسيت اسمي و انامن
تهت ارجوك دليني عليه

غرامك بالكلب حافر و ناقش
يلصرت نيران تحركني و ناقش
اريد اكعد وياك و لك بس احجي و ناقش
و اكلك لشوكت تقسى عليه

صديجي الجان رايدني و اريده
رخص دمه و كطع لأجلي وريده
صديجي الجنت أحبه وريده
شماله شوكطع وصله عليه.