يعنني الله على العواصي من السنين

يعنني الله على العواصي من السنين
وآنه بيـــه عناد ويـــا العاصيات
وزى يوازني و أواكح ما ألين
وأرجي ضلعي على الرماح المشرعات
آخ ما اكولن وهاذ المـــايصير
ولا أطمعهن وأبين لهن شكاي
هي روحي ووطنتهه على اللهيب
وميــــزة الفــــولاذ يصقــــل بالشـــوات
طبع كهوه اشماتعظني النار حيل
آخذ من النار محمود الصفات
روحي أبوهه الضيم وأمهه المستحيل
وهي وسنين الكحط ولدن خوات
أنا مغرم بالثكــــال من الحمول
وصلب عودي وهالجتاف معركات
شكثر منهن حملت بس ما لعيت
ودفتي من الجلد طلعت والعبات
وحدر هدمي وكامتي يتكسرن
والنصال على النصال مخالفات
واعتنيهن لو عليه ما سيرن
اخاف ينقال انكسر بالعاتيات
ولو أدريهن ضواري ولا أهاب
وصرت أواسدهن وألف راسي وأبات
الحكمه انك تعتنيهن للمجـــان
لا تتانيـــهن يجنك صايلات
انثر غبارك على وجه السنين
كلهه تفنى وهن ذن الباقيات
والله اليطخ كامته يسموه ذليل
وانه ما أرضى تصفني بهاي الصفات
مر علي كل شي وضقت حد ما رويت
أخاف اكــــدر خاطرك بالتسميات
العسر والجوع والهــــم والدموع
وكصره اليد والهدوم الباليات
أنه فضله ضيم فرتني الرحي
ودولبتهه وما مللت طاك الرحات
وبخضم هذا الصراع تريد أنام
ياغشيم ينام ويلذ بالسبات
خلني أشد وزار وأتلكى الصعاب
كبل لا يسطن علي موزرات
لا تكدر خاطري لو ردت أجيك
وتشتكيلي من المضن والآتيات
وصرت ممن لأن عاري من الثياب
وهو ياسلاب اللي يسلب عراة
وبرغم كل الصار وبرغم اليصير
ما تزل أجدامنا من الثابتات
أنا ما مجبور أصدك كل ما يقال
ولا أردد ما سمعته من الرواة
أنا مصدرهن إذا زل الحديث
وانا بهلول اليعضل الراهيات
لأن بارم خيط وكتي بالجفوف
وبإيدي سديت الغزل للمسعدات
شلون أجفل عقب ما صار الطراد
وجنت أتانيهن وهن محددات
ولحيه الماتنحشم يوم الصياح
لا تعدهه من اللحايا الغانمات
عيش ذيب الدنيا مو دنيا الخراف
الموت للخراف تحيا الضاريات
هم شفت ذيب جتفوه للكــصاص
وداعتك بس الشياه مجتفـــات
وهي غابه وذيب يتسطه على ذيب
ويتعشى بصاحبه كــبل الغدات
يادواليب الوكت فريــني حيل
أنا أدور راحتي بالموزمات
بيه سوله السهل ما والم هواي
الا أمد ايدي وألوح العاليات
ولا أدور طوش من حدر النخيل
كود أعت روس العثوق المثكــلات
الماي من يركد فسد ما أشتهيه
ومن خباط الماي أطلع الصافيات
وحصتي من الخيل تعجبني الجموح
شنهو نفعه الما يروض الجامحــات
وأعتني النزرات كل ما أبعدن
وقيمه المنظوم جمع الشــاردات
هي لذه الصيد أصلا بالطراد
وخيبه الصايود جمع الطايحات