سالفة ورباط

سالفة ورباط
=========

بيوم من الايام الذيب هجم على بيت ولد من جماعتنا واخذ واحد من طليان ابو البيت
وگام ياكل بشراهه لانهُ جوعان حيل ،وهو ياكل غص بعظم وحاول يطلعه ما گدر وبقى يومين يحاول ويتألم،
هنا الذيب شاف طير يسمونه طائر الروان ،منگارة طويل ،اتفق وياه الذيب اذا طلع العظم من بلعومه ينطيه أكرامية تعادل محولة كهرباء بهذا الوكت
المهم الطير وافق وگال للذيب افتح حلگك واني ادخل راسي واجيب العظم بمنگاري الطويل.
الذيب فتح حلگه والطير مد راسه وگام يدور عل عظم ،المهم طلع العظم من حلگ الذيب ،هنا الذيب انتعش ودار وجهه وراح،،،
صاح وراه طائر الروان اابو ثرب
وين الاتفاق اللي بيني وبينك،اريداكراميتي،،،،
التفت عليه الذيب وگاله انطيتك اكبر أكرامية،،،
گاله الطير شنهي اكراميتك بلا ،،
گاله اكراميتي راسك سالم اكو طير يحط راسه بحلگ ذيب ويطلع سالم،
روح احمد ربك واشكره الصبح والعصر من عفتك سالم.

شاهد سالفتنه::
===========

كل واحد طبعه غدار وكذاب ونمام وقفاص،،،
من تتعامل وياه إحمد ربك الصبح والظهر والعصر اذا طلعت منه سالم والعاقل يعرف وين يخلي منكاره.

سوالف أهلنا
سالفة الحـــظ والبخـــت

يگولون أكو واحد عنده إخوّه أكبر منه بس مكتفين بيه أخوته وعمامه من تصير إطلابه يحلها واخوته مايحچون الّا يحظر هوه ... أخوته صاروا عدهم ولد كبروا گامو يطلعون بالمناسبات ويگعدون بالمضيف مرات يحچون يعني ينطون رايهم ... واحد من ذوله الولد گام ينافس عمّه بالحچي ... من تصير أطلابه لو ينجمعون عمامه يتدخل بكلشي بس محد ياخذ برايه ولاواحد يمشي بيه ... المهم راح لبوه گاله بويه شو أني شكلي حلو ولبسي خوش لبس وخوش أحچي ليش من اسولف محد ينتبهلي والوادم كلها عيونها على عمي من يسولف
ف گاله ابوه صحيح أنت شكلك حلو وخوش تلبس وخوش تسولف بس عمك زايد عليك بثنين ماهن عندك گاله شنهو الثنين اجيبهن باچر ... گالة يبويه ذني مايجن بفلوس ولا بحيل صدر هذني ( الحظ والبخت ) يولدن وي الزلم اليركبه الحظ والبخت سالفته مسموعه وتمشي ربعه برايه والماعنده ذني يبويه مثلك تغير وي الغايرات ودومك مسبوگ ماتحصل بس التعب أخذها من ابوك نصيحة لاتتعالا ويا عمك…. وگاله :

اليفصّل هــــدم يختار بيــــها الزيـــــن
ولــوردت تكبــــر لازم بيـــك اثنيـــن
حـظ وبخــت يراد مرافچهن بكل حين
بالك مــن الزغــل تــــراه ديــن بــدين
لاتنغر بالهدم چم ملبوس مو معروف هوه أمنين

سالفتنه هسه رباطها بالبيت الأخير خوش نصيحة ...
لاتنغر بالهدم جم ملبوس مو معروف هو منين .....

مو يجيك واحد تاريخه وتاريخ أجداده لا دلة گهوة ولا فنجان بس عنده جم فلس لو صار بمنصب وصار يدعي الشيخه وبناله مضيف إشطوله وجابله إدلال وفصله إشجم قاط وگال انا شيخ فلان يا عمي على كيفك الشيخة أهلها معروفين إشويه إلزم حدك واحترم واخذ ثگل

تقبلوا تحياتي

انطي الخبز خبازه لو اكله نصه

عندي صديق الله وفقه بتجارة الملابس وسواله شركة النوب الشركة صارت هم وغم علي مو عارف شنو يسوي لا يعرف يديرها لانه مو تخصص ادارة ورجال ما دارس ادارة وظل يخيط ويخربط لو باقي على دكانه هواي احسنله المهم تبهذل كلش اجاني بس يريد يبچي صدفة كان ضيف يمي انسان صاحب شركة قديمة صديق الي ومقرب قتله مروتك ابو الغيرة هذا سالفته كذا وكذا واريدك تسويله حل ما يدري يسد الشركة لو يخليها وبس نريدك تنطي رايك يعني مثل مشورة قال بسيطة بس بشرط اقوله روح يمين يروح واذا اقوله روح يسار يروح قتله الرجال قابل المهم مالكم بالطويلة ثاني يوم رحنه واجتمع صديقي بالموظفين واحد واحد اخر النهار قال سبب المشكلة صاحبك كلشي ما يعرف بالادارة ورأساً سواله نظام كامل للشركة وطرد موظفين شافهم مالهم داعي وجابله اثنين مكان الموظفين الي طردهم قاله هذوله لو تموت ما تطلعهم من الشركة وهم خليهم الي يديرونها انت خليك من فوك لان الادارة مو شغلتك وفعلًا كانت قراراته بسمار بلوحة ذهب والامور الحمدلله لله استقرت وصاحبي يندعيله .

#الشاهد الله خالق نظام للكون لازم كل مكان يگعد بي صاحب التخصص والا تصير #فوضى يعني لو تنقلب الدنيا الكبد ما يقدر يشتغل شغل الكلى والبنكرياس ما يشتغل شغل المرارة كلمن وتخصصه ما يصير يجي المعلاگ ويقول انا اصيرن بمكان الگلب تصير تيسي فيسي تمبليسي.

الاب خيمه
من سوالف اهلنا القديمة ---- وبيهه حسچه
يكولون بذاك الوكت اكو رجال حجي جبير بالعمر يسكن الصحراء هو و اولاده وعايلته
وشغلهم بالصحراء يطلبون العشب لحلالهم
وجان الحجي أبو الولد يوميه يكعد ولده الصبح يروحون يسرحون بالحلال ومايرجعون الا والدنيا غروب
ليش ما يوم من الايام اجوا وجايبين وي الغنم ..بعير
اهنا ابوهم تلكاهم وكاللهم ...ها بويه منين جبتوه هذا البعير
الولد كالوله بويه لكيناه تايه بالصحراء وجبناه ويانه
الحجي بويه باجر ترجعونه منين ماجبتوه الولد كالو لبوهم
بويه قابل احنا بايكينه ،مسلبينه احنه لگيناه تايه وجبناه ..مانرجعه
الحجي كاللهم بويه تره اذا مارديتوه البعير للصحراء وضل عدنا بالبيت البعير راح ياكل واحد من الخرفان
الولد ضحكوا وكالوا الحجي يتكشمر ويانه لو بين عليه الكبر
المهم ثاني يوم اجو من السرح بالحلال وهم كاللهم ولكم بويه اذا مارجعتوا البعير ترى راح ياكل اكبر خروف عدنا وانتم بكيفكم
الولد كالعاده هم ضلوا يضحكون وماداروله بال
اليوم الثالث هم اجو من السرح بالحلال
وجان يجون ثلث خياله
ويحولون على الحجي
ويكلوله حجي هذا البعير مالنه وصارلنه ثلث تيام ندور عليه
الحجي كاللهم ..اي بويه هذا البعير بعيركم
الولد گبل يومين لكوه تايه وجابوه للبيت
هسه تفضلولوا بويه للبيت
بعد ما رحب بيهم وگعد يمهم مع اولاده
وجان الحجي ينادب لأولاده كاللهم بويه ..كوموا اذبحوا اكبر خروف عدنا للضيوف
فكاموا الولد وذبحوا اكبر خروف من الغنم وطبخوه للضيوف
بعد ما كلوا الضيوف الخروف واخذوا البعير ..ورحلوا
رجع الوالد لابناءه وهو يضحك ها مو كتلكم هذا البعير اذا يضل يمنا وياكل اكبر خروف من غنمنه
وهسه الخروف انوكل والبعير رد لهله
الولد كالوا صدك الجبير بالبيت خيمه و حكمه وبخت وكاموا يعتذرون من ابوهم وحبو ابوهم بحلكه وبراسه وبيده وهمه يرددون كون يابويه تبقى ذخر وخيمه النه يابويه
شاهد سالفتنه ورباطها
ترى الجبير بالبيت بركه وكله حكمه وحسجه وبخت والي عده جد چبير واب چبير ترى هذا يعتبر عنده كنز
ويبقى الاب دائما هو الخيمه للعائله
واريد اناشد اولادنا بويه ديرو بالكم على خيمتكم قبل لاتخسروهم
الله يحفظ اباءكم واجدادكم ويرحم أموتاكم ..
وان شاء الله كلكم اهل خير وبركه احبتي الطيبين ..
تحياتي
منقول

·
سوالف اهلنا
هذه القصة كانت قبل 100 عام .. حيث كان الاب يعيش مع اسرته في احدى القرى القديمة والتي ولي عليها واليا ليدير شؤنها مع القرى الاخرى .. فالقصة بدات عندما كان لديه هذا الوالي اب عجوز كاهل بالسن اشيب لا يقدر على الحراك ضعيف البنية ليس له حول منه ولا قوة ..
كان هذا الوالي مهمل بابيه لا يهتم فيه ولا بتنظيفه ولا بترتيبه ولا حتى يسأل عنه اذا اكل او شرب .. بمعنى اخر ينتظر وفاته ليتخلص من ذلك الاب العجوز الذي يعيق عليه طريق حياته ويخزيه بين الناس نظرا لعجزه وضعفه .. حتي انه كان يرميه بالشمس لساعات طوال على حصيرة من القش تحت اشعة الشمس الحارة … دون ان يتذكر ان هذا الرجل المسكين كان يوما من الايام من ساعده على ان يصير بكبر ورعاه في صغره حتى اصبح قويا ..
الرجل كان لديه ابن صغير في العمر لم يتعدى الرابعة عشره .. وفي يوم من الايام ..قرر رؤساء هذه القرى الاجتماع عند هذا الوالي وفي منزله .. وبالفعل جهز هذا الرجل لهم جميع متطلبات الضيافة وما يحتاجونه من توجيب ولوازم .. وعندما اقترب موعد قدومهم .. وفي ظل توتر الرجل في المنزل حيث يريد كل شئ مجهز بشكل منمق .. واثناء اسراعه تعثر بوالده !! .. ونظر اليه والده نظرة افهمه فيها انه لا بأس اكمل عملك .. لم يحن قلب الوالي القاسي على ابيه .. فنادى ابنه الصغير بصوت عالي وقال له هيا ساعدني لانقل جدك خلف المنزل حتى لا يراه الضيوف ..
وبالفعل قام الولد بمساعدة ابيه بنقل جده الى خلف المنزل واخذ الحصيرة التي كانت مطوية على وقال لابيه انتظر يا ابي .. وذهب ليحضر سكينا حتي يجهز لجده مكان جلوسه .. وبالفعل قطع الولد الحصيرة الى نصفين ووضع النصف الاول تحت جده .. واخذ النصف الثاني ليحتفظ به .. واثناء ذلك قال له ابوه ما بالك يا ولد لماذا فعلت هذا .. فقال له الابن احتفظت بها حتى تكبر لاضعك مكان جدى بعد ان يموت .. فصعق الاب من كلام ابنه الصغير وقال له من علمك هذا قال له انت من علمتني هذا بفعلتك بجدي المسكين .. فانهار الاب على الارض ومسك ولده واحتضنه وقال له لا يا ولدي لم اكن اقصد ذلك .. فقال له الابن بلى انت رميت اباك الذي علمك وكبرك وها انا انتظر اليوم الذي سارميك فيه مكان جدي .. فنظر الاب الى ابيه فوجده يبكي بحرقة شديدة دون ان يتكلم كلمة واحدة ..
واخذ يد اباه ويظل يقبلها وهو يبكي ويقول له سامحني يا ابي لقد غرتني الحياة .. واحتضن ولده واخذ اباه العجوز وحممه ورتبه وقص شعره .. والبسه اجمل اللباس ووضعه في صدر المجلس ..
وعندما دخل الرجال .. قال لهم … يشرفني ان يكون هذا العجوز والدي .. وهو يبكي من شدة حرقته على ابوه وما فعل به

·
مسافر عاد إلى الوطن عن طريق السيول بعد غياب دام اكثر من خمسة وثلاثين عاما ؟؟؟؟؟؟؟
جرفت جثمانه السيول القادمة من إيران نحو منطقة المشرح في العمارة بعد ٣٧ عاما أمضاها مطمورا في العراءٍ انه المواطن العراقي الجندي عبد الامير حاج جبار الجادري الذي قيد مفقودا في الحرب العراقية الإيرانية ١٩٨٠-١٩٨٨
ساعته توقفت لكنها منذ ذلك الزمان ، ربما بقيت على قيد الحياة لبعض لوقت بعده،لكنها ليست كما عظامه رميم،كأنه إذا كان حين أقبلت ساعته وحيدا.
عشرون فلسا ودرهم من ذلك الزمان وقلمٌ، وقرص اسمه الشهيد.
بعض الذي تشبث بالرفاة
مغترباً كمثله مجندلا بعيد.
انتهت الحربُ،وعادت ناقلات الجند للوطن واندلعت ثانية، واندلعت ثالثة أخرى ورابعة ولم تقف حروبنا للان ، واحترقت ناقلات الجند اجمعها،لكنه على مشارف الوطن ْقد ركب السيل لكي يعود.
لترقد رفاتك الوفية لهذا التراب بسلام ، تبدل العلم ، ومات قادة الجيوش وكل حرب نموت فيها تصبح بلا قيمة عندما يموت قادة الجيوش او تتبدل الإعلام ، هذا قدرنا يا عبدالامير ..
وقدرنا ان ألوف الرفاة لا تزال في العراء او اننا مشاريع رفاة مؤجل

من سوالف أهلنا على المواسم
في الصيف
اول عشرة من أب... تيبس البسمار بالباب
ثاني عشرة من اب... اتقلل الاعناب واتكثر الارطاب
وثالث عشرة من أب.... تفتح من الشتا باب
ايلول (ن).... سيرو لا اتجيلون
في الشتاء
برد عنتر
الضريبة
الليالي السود
العجوز
ضم الخشب الكبار إلى برد آذار
نيسان امغرك الفرسان
وكثير من السوالف الطيبة
كما توجد مقالة تختصر سوالف أهلنا مبينة في أدناه
برد العجوز والچلة الخرسة وجويريد حكايات من ذاكرة أجدادنا القدماء …
قد اطيل عليكم في هذا المنشور لكن فالنهاية تفهمون تلك المصطلحات القديمة
اولآ
لايام الشتاء البارد حكايات قديمة مازالت بعض خيوطها معلقة في اذهان كبار السن الذين يحالون تفسير الظواهر الطبيعية طبقا الى ثقافتهم الاجتماعية
ثانيا
واحيانا يطلقون العنان لخيالهم الخصب في سرد وتأويل الاشياء بروحية فيها نوع من الغرابة المغمسة بالطرافة وعادة تبدأ هذه الحكايات حول موقد النار حتى اخر قطعة خشب وهي اشارة لساعة النوم حيث زمن البساطة والعفوية
لبعض الحكايات موروث تاريخي يمتد لالاف السنين كما قال احد الباحثين وقد يتصور البعض ان ( برد العجوز) هو حكاية من الادب الشعبي المعاصر الذي لايتجاوز المائة عام او اكثر لكن الحقيقة عكس ذلك ان هذه الحكاية قديمة جدا ترجع باصولها الى العصر الجاهلي ،ومفادها ان امرأة عجوز ارادت الزواج بعد وفاة زوجها فكره ذلك اولادها واشترطوا عليها من اجل الموافقة المبيت سبع ليالي في العراء فماتت هذه المرأة دون تحقيق رغبتها ،حتى قال الشاعر في الموضوع :
بصن وصنبر ووبر معلل بمطفىء حمر امر نعم مؤتمر
تولت عجوزا عقب احدها شباب ربيع يانع نضر
ومن الحكاية يمكن معرفة ان ايام البرد هي سبعة وهي تقريبا في نهاية فصل الشتاء
ثالثا
ويضيف الباحث اما (الجله الخرسه ) هي اشد ايام الشتاء بردة وهي قد تكون مأخوذة من (الجلة ) عند المتصوفة الذين عليهم الخلوة واعتزال الناس (40) يوما ،اما بخصوص (جويريد) فق جاء من تجرد الشجر من الاوراق والثمر للقساوة برودته .
لشهر شباط هو اواخر ايام الشتاء حكايات وامثال مازال البعض يرددها ،كما يقول وهاب العبيدي باحث في التراث الشعبي: الذاكرة الشعبية العراقية مفعمة بالكثير من الحكايات والامثال التي تدل على سيادة نوعية من الثقافة ،فنسمع من كبار السن ان هذه هي ايام (برد العجوز ) وهي تصيب العظم واللحم و(جويريد ) و(الجله الخرسه ) و( شباط الازرق )وغيرها ،واعتقد ان هذه التسميات جاءت نتيجة لتجربة معينة ثم تناقلها جيل بعد جيل ،ربما يكون شباط من اكثر شهور الشتاء اثراءا في الامثال الشعبية منهاشباط حضر للجسر رباط ) وحكاية هذا المثل ان شباط شهر يكثر فيه المطر والفيضانات ،لذا يجب الاستعداد بربط الجسور بقوة خوفا عليها من الانخراف لانها كنت مصنوعة من الخشب .
اربعا
كان لليالي الشتاء الباردة خصوصية عند اغلب العوائل العراقية حيث تلزم دورها وتقضي الوقت بقرب (منقلة ) الفحم وجلسات السمر وحكايات الاجداد لاحفادهم،الحاجة مهدية فالح من اهالي منطقة باب الشيخ سابقا تقول : اتذكر جيدا كيف كنا نلتف حول جدتي رحمها الله وهي تقص لنا حكايات (ابو زيد الهلالي ) و(عنتر وعبلة ) و(السعلوة ) و(الطنطل ) وغيرها ،اما جدي بعد صلاة المغرب يذهب في (تعلوله ) مع بقية اهالي الطرف في المقهى .
نسسج الكثير من الحكايات حول الشتاء لها مدولات وحكم ،كما يقول الحاج موحان اللامي : الناس يحاولون تجنب برد الشتاء القارس خصوصا في شهره الاخير حيث يوحي اعتدال الجو بان الشتاء قد ذهب دون عودة ،وهناك حكاية طريفة عن امراة لها بقرة وحيدة وتعتز بها جدا ، وقد غرى نهار شباط الدافىء ان تترك بقرتها في المرعى (المراح ) حتى اليوم التالي ،فوجدتها ميتة من البرد ،فقال هذه المرأة (لاتكول شباط راح شباط نايم بالمراح )،وايضا هناك (هوسه ) تقول (عرس علول بشاط الازرك ) حيث يسمة بالازرق لبرده الشديد.
خامسا
نسمع المثير من المصطلحات الشتائية على لسان الكبار قد لايفهما جيل اليوم ،كما قال الحجي فرحان : (جويريد ) و(الجله الخرسه ) و(شباط الازرك ) هي من مفردات جيل له خصوصية تتمثل في تفسير الظواهر الطبيعية مثلا دائما كنت اسمع جدتي رحمها الله تقول هذه ايام (جويريد)او (الجله الخرسه ) او (برد العجوز )وقد تكون هذه المفردات لاتعني شيئا لجيل اليوم ،ولكنها بحد ذاتها تشكل عمقا تاريخيا يمتد لالاف السنين ،وعندما سألت جدي عن هذه التسميات قال لي (جويريد ) سمي بهذا الاسم لانه يجرد الاشجار من الثمار والاوراق ،اما (الجله الخرسه ) فهي جاءت من بردها الشديد الذي يكمم افواه بعض النساء المعروفات بالثرثرة اما (برد العجوز ) فقصتها مشهورة في كتب التاريخ حول امنية عجوز لم تتحقق وكيف وجدت مية بسبب البرد،ويضيف ان مثل هذه الحكايات ذات نهكة نفتقدها اليوم ،حيث تسود البساطة وتجمع العائلة حول المدفأة بدون كهرباء ولا تلفزيون
ملاحظة بعض المعلومات مأخوذة من الاستاذ عبد الكريم لكن للاسف لم أستطعت التواصل معه
هذا والله اعلم

من سوالف اهلنا
اليوم سالفتنة على ( الشيوخ )
يگولون اكو عشيرة مات شيخهة وماعنده خلفة بس اوليد شاب صغير مريض..
اجاويد العشيرة ضلوا حايرين ماعدهم شيخ.. وگام كل واحد منهم يريد يصير شيخ وكثروا اليريدون الشيخة
گالو احسن شي نروح للفريضة ونسولفلة شغلتنة بلكت يگدر يختار النه شيخ..
اجو للفريضة گالولة بالشغلة.. صفنلهة اشوية..او گاللهم اليريد يصير شيخ اني اختبره اذا نجح بالاختبار هو يصير الشيخ موافقين؟؟گالولة موافقين..گاللهم گوموا اطلعوا وخل يجيني واحد واحد..
اجة اول واحد گاله شنهي امس وشنهي اليوم وشنهي باجر؟؟هذا ظل يبلع بريجة ماعرف يجاوب..گاله اگعد..جيبوا الثاني اجة الثاني وسأله نفس السؤال وهم ماعرف كله اكعد..
اجة الاخر والاخر والاخر وكلهم نفس الشي..ماعرفوا كلهم..
گال العارفة كلكم خو ماعرفتوا گالوا اي والله..گال ادري هذا شيخكم كلشي ما مخلف..گالولة مخلفله ولد زغير مريض مايرهم شيخ..
گال جيبوه خل اشوفه..جابوه گاله استريح يعمي اجه الولد تخطه الگاعدين كلهم او گعد بصف الفريضة
سأله الفريضة گاله عمي شنهي امس وشنهي اليوم وشنهي باجر گال امس ابوي واليوم اني وباجر ابني..
هذولة الگاعدين گاموا واحد يلتفت على الاخر..
الفريضة گال يغاتي هذا الولد هو شيخكم..
ما اطوللكم السالفة ... هسة سالفتنة مو ياهو اليجي يحطلة عگال على راسة وگال اني شيخ عمي الشيخة رس أصل الشيخ يحفظ أهله وديرته مو صح لو آني غلطانة..

اسولفهة للطيبين البعد بيهم ملحة اهلنة الاولية
.
في احد الايام حدثت مشاجرة بين اولاد العم في احد قرى الجنوب فقتل احدهم الاخر وبعد الفصل تقرر ان يرحل القاتل وكان له ولد وحيد
انصاع الرجل لامر العشيرة ورحل مع ولده حيث نزل بجوار احد قرى المعدان وكان يفصل بينه وبين هذه القريةنهر ...
ومع مرور الايام انتبه الاب ان ولده الوحيد يطيل الجلوس امام هذا النهر ولحرصه على ولده قرر ان يتبعه ليرى ماذا يفعل الولد فرأى ابنه يجلس على جرف النهر مقابل شريعة قرية المعدان وعليها فتاة تملأ جودها بالماء تقرب الاب من ابنه دون ان يراه الابن فسمعه يخاطب الفتاة ويقول

كتلني ألبشريعه ترس ** مايات
أخذ عكَلي وبيه ألأرض ** مايات
لو أدري أبأرضكم هاي ** مايات
ولا شخصك نظرته بهل ألدنيه
**
وقد ردت عليه الفتاة

حبيبي البطن صيني موش ** معدان
وحجاياكم بلب ألكَلب ** معدان
سألني ألأصل كَلت ألأصل ** معدان
ألمسكن دبن وألعيشه هنيه
**
بعد ان سمعهما الاب رجع لمنزله ولما عاد ابنه قال له

بكَلبي حاسب الحسبات ** شتان
ومن ألكَيض بيه رماح ** شتان
مابين ألفرح والكدر ** شتان
أحيرن بيك لو تحتار بيه
**
عرف الابن ان الاب يعلم بحبه فقال له

أشوصلك ياخبر منهم ** شتالك
ألنار الكَلب بعيوني ** شتالك
يبويه أنه أصبحت أخر ** شتالك
وريد أيطك شتالي بهل ثنيه
**
حن الاب لحالة الابن وقرر ان يذهب لمضيف شيخ القرية عله يجد سبيل لأسعاد ابنه الوحيد فلما دخل المضيف وجد والد الفتاة جالس ويرتدي ثوب من نوع بُـته فجلس بجواره اعد ان سلم على الموجودين وقال له

سليل أهل ألمكارم لبس ** بته
وبسده لذيذ ألنوم ** بته
لبن كَلبي ردت ياربع ** بته
شريفه ومن شريف وشرف ليه
**
فهم الرجل معنى الكلام وأجاب الضيف قائلاً

ألدنيا بلا مكارم ** من عباها
تبشر لون خايف ** من عباها
تعالنه وخذها ** من عباها
لون ترضه كَلب ولسان هيه
.