قصائد حسينيه مكتوبه 7

#نزله
...
صرخة غارته..حانت صولته

نهر العلكمي,,بيمن يحتمي.يصرخ ياعلي

دخيلك ياعلي

.......

مابين الكفر.وبزوده يمر.والواكف شمر.عباس اعتنه

نازل للحرب.واليهم ضرب.عباس اليطب.للماي ودنه

رايح للنهر.عالشاطي عبر.مهيوب الكمر.ماراسه حنه

وبحيله وكف.والماي ارتجف

نهر العلكمي.بيمن يحتمي.يصرخ ياعلي

......

تربات الفحل.للحومه وصل.بجفوفه اجل.ليث المرجله

شايل رايته.بيها غيرته.زينب نخوته.يكلب كربله

بيده جربته.حقق رغبته.راد بهيبته..يسكي العائله

طب للمشرعه..وجفه نكعه

نهر العلكمي.بيمن حتمي..يصرخ ياعلي

....

وبخيل الزلم.طشرها ويلم.عباس الشهم.محد كربه

وبذاك الزمن.وبيوم المحن.بجفوفه علي.يمكن دربه

يوم الواقعه.اعلن فاجعه.نزل قارعه.حيدر جربه

نعمين وكفو.ماعنده عفو

نهر العلكمي.بيمن يحتمي.يصرخ ياعلي

.....

زينب تنتظر.مابين امر.ودموع العمر..حست بالهظم

طالت غيبته.هيه اترجته.خويه نادته.جرحك بالعظم

ياهيبة وفه.روح العاطفه.الشاطي نشفه.وبطنه زلم

سواهم جسر..لعيون الخدر

نهر العلكمي,بيمن يحتمي,يصرخ ياعلي

....

خله الموزمه.بيده محزمه.وتنكط دمه.عسكرهم غدت

يخطف صارمه.يذبح بالظمه.خلاها السمه.لجله هلهلت

تاج المفخره.جنه حيدره.سبع الكنطره.بيه اتشرفت

خلاهم حطب.نيران ولهب

نهر العلكمي..بيمن يحتمي.يصرخ ياعلي

......

شاف المشرعه.يمه مفرعه.بيها مصرعه.جيوش الحاطته

بالجربه دخل.غطاها بخجل.عباس البطل.هاي مروته

ماهمه عدد.والجيش ارتعد.عباس المدد.صاحت صرخته

بعيونه خزر.والماي انتحر

نهر العلكمي..بيمن يحتمي.يصرخ ياعلي

.....

الشاعر علي الحاج الصبيحاوي


















زلزل الحومه ابو فاضل
طلع عباس
بين علومه ابو فاضل
طلع عباس
....
عن يمينه الجيش صاح
وبيسار الگام طاح
ابو فاضل
الجيش يم جفه عبيد
بصارمه وصوته يبيد
ابو فاضل

الحرب يومه ابو فاضل
طلع عباس
زلزل الحومه ابو فاضل
طلع عباس
.....
صارمه وي النجم
خلخل صفوف الزلم
ابو فاضل
علم الموت الحياة
تيه اعداه الجهات
ابو فاضل

منهو اليلومه ابو فاضل
طلع عباس
زلزل الحومه ابو فاضل
طلع عباس
....
طبگ يمنه عله الشمال
ما ترك بيهم خيال
ابو فاضل
الحومه صارت لعبته
مات اهلها بصيحته
ابو فاضل

غضب بهدومه ابو فاضل
طلع عباس
زلزل الحومه ابو فاضل
طلع عباس

...
ابن حيدر نخوته
لمع ما بين اخوته
ابو فاضل
گام زينب وصته
النهر جاب بجربته
ابو فاضل

شيخ وبگومه ابو فاضل
طلع عباس
زلزل الحومه ابو فاضل
طلع عباس
...
برق وبليل الدجي
منين ما نضرو يجي
ابو فاضل
يرعب بزوده الزلم
جن حقيقه وجن حلم
ابو فاضل

ضربه مسمومه ابو فاضل
طلع عباس
زلزل الحومه ابو فاضل
طلع عباس
...
هز بديه بيرغ لواء
كبر املاك السماء
ابو فاضل
النصر اصبح قريب
ماكو يم اسمه عجيب
ابو فاضل

نصر محتومه ابو فاضل
طلع عباس
زلزل الحومه ابو فاضل
طلع عباس
....

حيدر عيسى البديري





المجموعة الخامسة قصائد حسينية مكتوبة نزلات
نزلة .... في رثاء الإمام العباس عليه السلام


عباس. ياحليف الرايه
عباس. شيعتك وفايه


نقسم قسم بچفوفك وبالرايه
شيعة ونظل طول العمر وفايه
ياسيدي نحضه برضاك الغايه
نوصل نزورك كل سنه مشايه
هيهات. عنك يبعدونه
هيهات. حبك يمنعونه


يابالفضل باب الحوائج بابك
لمن نزورك نسجد عله عتابك
نتشرّف ونشتم عبير ترابك
طبعك رؤوف وتفرح باحبابك
معروف. ماترد كل زاير
معروف. بالشدايد حاضر


لمن نطب لمرقدك نتهنّه
جنة ضريحك احله من الجنة
تنطينه انت شنطلب ونتمنّه
كل شيعي يمك ماتخيّب ضنّه
ننخاك. بالشدد تحمينه
ننخاك. والله ماملينه


يابالفضل خدامك ونتباها
خدمتنه هاي بعينك وترعاها
كل النواصب احنه نتحداها
رغماً عليهم رايتك شلناها
للموت. احنه نتحداهم
للموت. مانعيش وياهم


كلما نزور بحضرتك نتذكّر
يوم الطحت عالمشرعه وموذر
طايح تلوج بروحك وتتفكّر
بحال العقيلة زينب وبالخدر
وفاي. ياگمر بعهودك
وفاي. ماخلفت وعودك


نذكر ابواليمه التعنه يشوفك
عالمشرعه ومگطعات چفوفك
ظهره نكسر لو بيده لا ميعوفك
حيله انهدم لمن فگد معروفك
عالماي. ودعه بدموعه
عالماي. صورته مطبوعه

خادم الإمام العباس عليه السلام
سيد زيد الفحام
__________________________




















#قصائد_ابا_الفضل_العباس

#مـۄسسـﮫ_مــﻥــبـريۄن_للالـﺢــان

الــﮠــاشــﺭ اζـــﻣــد الــﺯۄار

ياعبـّاس ﭼـفـّينك صـُفن وين
أدري مهمومات يسعن للولي إحسين

▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁





غيره غيره العباس .. ما يخلي الها انفاس
....
غيره غيره العباس
....
اسمه بيرغ عالي
يكشف الليالي
شمس بالعوالي
للحسين الغالي

يفدي روحه لحسين .. هامه عينه وجفين
ما يخلي الها انفاس
....
غيره غيره العباس
....
گال اجيبنه الماي
هوه وجروفه وياي
انه اسمي الرواي
النهر يعرف معناي

العلكمي ومايه يطيح .. لو امر يمه يصيح
هذا راعي النوماس
غيره غيره العباس
......
كبر بصوت الصور
موت وبجفه يثور
غضب ع الروس يدور
ظلت الجيش نحور

بيها اثر ضرباته .. واكو من نضراته
جثث ظل بلا راس
غيره غيره العباس
....
سودن المعسكر
نزل ليها وكبر
ارواحهم منهم جر
روس سيفه وذر

ليل خيم بيهم .. صاح صوته عليهم
للخيم منهو الجاس
غيره غيره العباس
.....
لو خزرها مهموم
ما تظل بيها هدوم
تعرف بهذا اليوم
واقعه وبيها علوم

ما يستره سيفه .. بهاي بس يعيفه
هاي من ذيج انقاس
غيره غيره العباس
.....
حيدر عيسى البديري


















لسان حال ابا الفظل العباس ع
//////////////////////////
تشتكي يمي العطش بت حيدره
اليوم لگلبهه السمه فوگ الثره
//////////////////////////////
ليوم لگلبهه السمه واشطر شطر
انه حي وتشتكيلي ام الخدر
شنو عذري باچر بيوم الحشر
لو نشدني القلع بيده خيبره
*****************
لو نشدني وگال يحزام الظهر
بالعطش يابا الفظل عندك خبر
همه سبع الاف حاطو بالنهر
وانته تشهدلك وگفت الگنطره
*****************
حالف وداعت ظلع امج اصول
واله اسبحهه بدمه كل الخيول
انه ابن حيدر علي فحل الفحول
اليوم اسوي يلعقيله الما جره
*****************
اليوم اسوي اسوايه التشيب الجنين
بيج وصتني وعلي ام البنين
گالت بوسط الحرب صير البطين
وصير عباس بنزول الميسره
*******************
راح اروح وهاي يمج غيرتي
خاف تحتاجين شي بغيبتي
انتي امانه من ابوي برگبتي
اي وحق ياسين والتين وبره
****************
اي وحق ياسين لرعبهم رعب
واله اخلي ادموم من عدهم تصب
انه اخوج وكافلج يوم الحرب
اله اعجب الناس والكون ابهره
*****************
اله اجيب الماي لخيامج ذليل
وراح اخلي بكربله ايطول العويل
اجيال تذكرهه وعلي حامي الدخيل
سيف اخوج امجاد بالطف صطره
///////////////////////////////
فاضل الغريباوي



















#حماسيه



هذا عباس يزينب .... هذه عباس

(١)

زلزل جيوش الكفر ... من نزل هذه البدر ... بالحومه

تسابگو وين المفر ... منهو اليكر شنهي الخبر ... وعلومه

گالو الكرار حيدر ... چن حضر للمعركة ... ومحسومه

بيد عباس يزينب .... هذا عباس

هذا عباس يزينب .... هذا عباس

(٢)

حامل الواه ابيمينه ... وللشريعه مگصده ... وبيهم دخل

من وسط ذيچ الكتايب ... يحصد ابروس العده ... تشوف البطل

چنه ملك آلموت حامل ... سيفه بالطف وغده ... عليهم اجل

سيف عباس يزينب .... هذا عباس

هذا عباس يزينب .... هذا عباس

(٣)

من دخل للحومه ... سبع الگنطره ... يرعد رعد

صاح انه العباس ... جيت الكربله ... وعندي عهد

لأم اخوي حسين ... بت طه النبي ... عهدي يرد

اخطف أنفاس يزينب .... هذا عباس

هذا عباس يزينب .... هذا عباس

(٤)

عهدي للزهره كتبته ... ابگطعت الچفين ... وبدم النحر

علمتني ام البنين ... شلون اوَفي ... ورضعتني من الدرر

توفي للزهره تگلي ... بشاربك يبني ... احلفك يالگمر

وفه عباس يزينب .... هذا عباس

هذا عباس يزينب .... هذا عباس

(٥)

والسبع تنعام منه ... ومن بطن ... ام البنين النگلته

تگله يبني رايح ويَ ... حسين تفديله ... حياتك وصته

ما أتاني لاجييتك انته ... وإخوتك بس أتاني حسين ...ابني ورجعته

اصله هل ساس يزينب ... هذا عباس

هذا عباس يزينب .... هذا عباس

(٦)

شايل الجربه على صدره ... ومتجه للعلكمي ... صوب النهر

من وصل يم الشريعه ... على الجرف ثبت لواه ... وچفه بالماي انغمر

گال أبد والله ما اشرب ... لذيذه وگلب اخوي حسين ... عفته يستعر

كله نوماس يزينب .... هذا عباس

هذا عباس يزينب .... هذا عباس

(٧)

چم درس منه وعبر احنه أخذنه ونقتدي

هذه عنوان الاخوه والقيَّمْ بيه تبتدي

اي وحقچ كون اروح الطفه واحديله حدي

قبله للناس يزينب .... هذا عباس

هذا عباس يزينب .... هذا عباس



طارق ابو محمد السماوي



















جنودك يعباس -- عالسواتر حراس
لمن يهجمون -- بسمك يهتفـــــون
عالسواتر حراس
______________
شالوا جفوفك بديهـم -- عوض عن الرايــــــه
شربوا الغيره بضماهم -- غيرتــك روايــــــــــه
بزودك تحزموا يكافــل -- للوطـــن حمايـــــــه
كلهـــا عباس السواتــر -- مــن يصــــل للثايـــه
رفعــــوا هتافـــات -- للذلــــه هيهـــــات
لمـــــن يهجمـــون -- بسمـــك يهتفـــون
عالسواتـــر حـــــــراس
**********************
خذوا منك هالدروس -- وبالحرب طبقوهــــا
لو يموتون بجمعهــم -- كـــاع ماينطوهــــــا
زينب وسامره كلهــا -- وكربله يحاموهــــــا
بالنجف والكاظميـــــه -- أرواحهم علكوهــــــا
ضحــــــوا بالارواح -- غيرتهـــــم اسلاح
لمـــــن يهجمـــــون -- بسمــــك يهتفــون
عالسواتــــر حــــراس
********************
كطعوا دروب المشارد -- بيهم احتـــــار الوصف
مثل ما انت اكطعتهـــا -- حاصرت سبعين الـــف
سيل عارم عالنواصب -- سيـــل ويخــلف خسـف
اربــاع يشطر ما ابالغ -- لغــــه قانـــون النصف
تدري بفعلهـــم -- ياهـــو المثلهم
لمن يهجمــون -- بسمــك يهتفون
عالسواتـــر حـــراس
*********************
خذوا من طبعك يكافل -- ماتهـــــم لعدادهـــم
تروح تستنكه بشجاعه -- تصيــد كل قوادهم
هالحشد عبــــاس مثلك -- كطــع كل امدادهـــم
لقنوا احفاد ال أميـــــه -- مثلك ويــجدادهـــــم
والنصرهم رايات -- غطت المسافات
لمن يهجمون -- بسمك يهتفون
عالسواتــــر حـــراس
************************

حلوه هوسات الغياره -- المايعرفون الخطـــر
احنه تربات اخو زينب -- وين ترباتج قطــــر
خلهم يلاكونه خلهــم -- الهم احفرنــه الحفر
ما يرد منهــم شريده -- لا وحق دم النحـــــر
وسط الميادين -- قسموا بالحسين
لمن يهجمون -- بسمك يهتفون
عالسواتـــر حــــراس
***********************
أنته حاضر يبو فاضل -- عالسواتر كـــل وكـــت
حتــى بزيارت لعاشــر -- انتـــه يمهــم مــارحت
خاف زوارك تناشــــد -- لبــو صالــــح كلفــــت
حظر مهدينـــه الزياره -- وانته بلجبهه احظرت
حشد المهمات -- حشد أنتصارات
لمن يهجمون -- بسمك يهتفون
عالسواتــــر حـــراس
******************************
الشاعر
كريم دانه الاعرجي




















هذا ياهو اللي لزم صمصامه
هذا ياهو الضربته اعله الهامه
گام راس يطگ راس .. هذا ياهو العباس
**
علي چنه بعينه.. وعد منطي سكينه شبل حيدر
يحش بيهه بسيفه..الموت صاربكيفهبيهم تخيّر
الحومه يفتر بيهه.. چفّه من يثنيهه** ما تحيّر
………………
ابن حيدر والمنايه تهابه
سيفه يزعل لو يشوف گرابه
سيفه هلهل والطاس .. هذا ياهو العباس
**
شال جربه ورايه.. والفرات الغايه** ابو فاضل
يحمي اخته بزوده..لعلي منطي وعوده**صار كافل
بويه اختي بعيني.. افتدي بچفّيني للمحامل
………………
عفيه ابني وهل مراجل منك
بالك ام الخدر تبعد عنّك
گام ينگط نوماس .. هذا ياهو العباس
****
العساكر خافت.. ابوفاضل شافت** شافو الويل
الموت جابه عليهم..ثاربينه وبينهم**من يطگ حيل
منهو يتحداني.. عالشريعه متاني** خل تجي الخيل
……
لو يطگ بسيفه يشطر طولهم
ابو فاضل حيراهه عقولهم
گباله ماظلت ناس .. هذا ياهو العباس
**
زينه هاي افعاله.. طگّته چتاله* * سيفه ولاهم
لو خزر بعيونه..چن علي يشوفونه**من اعتناهم
صفّت على اعتابه..ليث وسط الغابه** تنزف دماهم
………………
گمره صارت كربلا بوجوده
راح صوب النهر شايل جوده
كلّه غيره واحساس .. هذا ياهو العباس
**
وگف وسط الحومه..كلهه تدري علومه** شنهي المنيه
دگ اساس الخوّه..كلهه تدري شسوّه** بالغاضريه
نگطت من چفوفه.. غيرته ومعروفه**راعي الحميه
……………
زينب اختي ومن گدر يدناهه
ياهو يوصلهه واخوهه وياهه
زينب ويه الانفاس .. هذا ياهو العباس
ـــــــــــــــــــــــــــ
سيد علي المدني





















النهر من شاف القمر .. لفلف جروفه وعبر
صاح قبل المعركه خل تفهم الناس
هذا ملك الموت نازل بإسم عباس
****&&&&******

ظلمت الدنيا وعذاب الله نزل..
أبو فاضل هذا لو خير العمل..
تحس رعيد الدنيا لو سيفه زعل..
الشمس لمن شافته غابت خجل..
جالقيامه ولو لحت .. بيده هالكدها صفت
بسيفه يقطع هالنحور ويفصل الراس..
هذا ملك الموت نازل بإسم عباس
****&&&&*****

احتاروا الجيشين لمن بيها صال
والدروب تسددت بوجه النذال
لمها عالشاطي وحده بيوم القتال
القبضه لو بيد الأسد تفلت محال
عسكر الكوفه انهدم.. وقف شيال العلم
نزل يم المشرعه بالدرع والطاس..
هذا ملك الموت نازل بإسم عباس.
***&&&&&&****

خيم اعلى المشرعه وشاف العذب
قال لو ميتين ألف لازم أطب
آنه أبوي العلم فنون الحرب
شنهو سبعين ويقطعون الدرب
والشريعه هلهلت.. ضحكت بوجهه وبجت
تعلمت منه الشجاعه وصبره والباس
هذا ملك الموت نازل بإسم عباس
*****&&&&&*****

بيده شال النهر واقرب شفته
قلبه جمره وراد يطفي جمرته
سمع سكنه تصيح عمي نادته
طفل أبوي حسين حاله حالته
العذب ذبه اعلى العذب ..وقال ممنوع الشرب
الماي قبل حسين لا مايذوقه عباس
هذا ملك الموت نازل بإسم عباس
*&&&&&*****

شال بيده القربه وأنوى للخيم
والكفر صوبين يم دربه اقتحم
بالغدر طاحت يمنته وجرى الدم
وعلى القربه آه من ذاك السهم
والله حيره حيرته.. لايمنته ويسرته
ولن عمود الغدر ويلي صابه بالراس..
هذا ملك الموت نازل بإسم عباس..
*****&&&&&****

صاح خويه حسين من طاح القمر
وأبو اليمه تخوصر ومحني الظهر
من الشريعه للخيم صارت الدهر
مابقى عنده صبر راح النظر
قام يتعثر يطيح .. ابو الفضل خويه يصيح
من وصل قبل عيونه وللنحر باس.. هذا ملك الموت نازل بإسم عباس
***&&&&&&*****

آنه أرجع للخيم لا مستحيل
اشلون أرد وزينب تريد الدليل
تقلي وحدك جايني وين الكفيل؟
من عقب عباس مايوجد بديل
هي تعرف حالتي.. من توگع خيمتي
قلها ظل عالمشرعه لاجفوف لا راس
هذا ملك الموت نازل بإسم عباس
***&&&&&******

كلمات أبو أحمد الصالحي
تمت كتابتها يوم اﻷثنين الموافق 22 أغسطس 2016
18ذو القعده 1437ه..






















#نزلة

لاتحشـميني ييمه لاتحشـميني
شيمه بيه ... هـاشـميه ... وأنتي تدريني
ــــــــــــــــــــــــــــــــــــــــــــــــــ ـــــــــــــــــــــــ
انه شبل الحسن جاسم انه ابن حامي الحمه
يمــه واتعرفيني انـتي من تصير المـوزمه
ما أهاب وما أبلي اليوم اســـوي الـحاطمه
سيفي فقار ابو الحمله وراح ارويه بالدمه
كربله تشهد عليه كربله تشهد
والهــويـه ... هـاشـميه ... وأنتي تدريني
ــــــــــــــــــــــــــــــــــــــــــــــــــ ـــــــــــــــــــــــ
اليــوم تاريـــخ المــعارك بيده يكتــب صفحتي
من اصول ويعله صوت الجيش تبدي صولتي
انه ما احـــتاج نخــــوه هاشــــميه نخـــــوتي
طفح بحر الغـــيره بيه امن ابو فاظل غيرتي
حيدري عزمي وجهادي حيدري عزمي
والسجيه ... هـاشـميه ... وأنتي تدريني
ــــــــــــــــــــــــــــــــــــــــــــــــــ ـــــــــــــــــــــــ
انه عــودي الحسن يمه مره وصاني بأمر
گال ياجاسم يبــويه الطف إلــه يـوم ويمر
النصرة حسين ابو اليمه ابـد لا لا تنــتظر
أرخص ادمومك الأجله دين جدك ينتصر
لازم الديني انصره لازم الديني
والوصيه ... هـاشـميه ... وأنتي تدريني
ــــــــــــــــــــــــــــــــــــــــــــــــــ ـــــــــــــــــــــــ
اليوم جيش اهـل الظلاله اليوم اراويه المــحن
خلو قادتـــكم تجـــيني جـاسم انه ابـن الــحسن
الزلــمه وينه الراد يبــرز خل يحظرله چــفن
الخوف والذل ماعرفهن تحت رجليني انطون
الجمع ما هابه واخافه الجمع ماهابه
الهيبه اليه ... هـاشـميه ... وأنتي تدريني
ــــــــــــــــــــــــــــــــــــــــــــــــــ ـــــــــــــــــــــــ
من تصير الحرب شوفي يمــه جــاسم بالحـرب
الطف نعــم صفين تصبح والحـــسن بيـهه يطب
سيفي سيفه وعزمي عزمه موسهل يدرو صعب
اليوم نار ابجــيش اميــه ابصارمي والله اشـــب
العمي افديهه حياتي العمي افديهه
مو بديه ... هـاشـميه ... وأنتي تدريني
ــــــــــــــــــــــــــــــــــــــــــــــــــ ـــــــــــــــــــــــ
اليوم من ابـرز اخلي الــي تشــهد كربله
عمي يستاهل حياتي وانه كلـي فدوه اله
الموت بالطف يا حلاته بين چــفينه حله
ياهلا ابعــرس المنايه بالــمنايه ياهـــله
حنتي من دمي ابچفوفي حنتي دمي
والمنيه ... هـاشـميه ... وأنتي تدريني
ــــــــــــــــــــــــــــــــــــــــــــــــــ ـــــــــــــــــــــــ
تمت والحمد لله
حيدر تركي الكربلائي

















(حفيدة موسـى ابن جعفر)]
#قصائد_شهادة_القاسم


#نزلة

يوليدي يجســـّام === وفـــّيني يجســـّام
ــــــــــــــــــــــــــــــ
إنصر عمـــّك اليوم == يوليدي يجاســـــــــــم
إوفيني يجيـــــــدوم == وإنت إبهاي غانم
هذا إحسين مهموم == يانبـــــــــــع الهواشم
إدخل وإگلب الحوم == واجــــــــه هالصوارم
أدري بيك صنديد === زود المجتبه إتعيد
يوليدي يجســـّام === وفـــّيني يجســـّام
ـــ
وصـــّاني الحسن بيك == لازم ترفـــــــــــع إلواك
ربنه اليوم يحميـــك == روحي إتروح ويــّاك
گلبي إبحبـــّه يرويك == يبنـي إو عيب ينساك
شرهم راح يرميـــك == تغرگ يبني بدماك
أدري بيك وإبـــــزود === تفدي الروح وإتجود
يوليدي يجســـّام === وفـــّيني يجســـّام
ـ
زهرة روحي يانور == لعيونـــــــــــــي يغالي
إنت إتروح منصور == وانـــــي إبضيم حالي
گلبي بيك مسرور == تشفعلـــــــــــي يوالي
وإنت إبمحشري سور == تحميني يعالــــــــــــــــي
والزهره تناديــــــــك === جيب أمــّك هله بيك
يوليدي يجســـّام === وفـــّينـي يجســـّام
ــــــــ
ربـــّيتك يمهيـــوب == منـــّك رايده إرباي
يوليدي يمحبـوب == تربي ليك عيناي
روحي إبفگدك إتذوب == مرهـــــم إنت لحشاي
گلبي بيك مصيوب == بعـــــــــدك ذاب بالداي
بعدك ياضوه العين === ظلمـــــــه دنية البين
يوليدي يجســـّام === وفـــّينــي يجســـّام
ـــــ
يبني إو نور دنياي == آلمنـــــي ونينـــــــك
يبني إجروحك إهواي == خالقنـــــــه يعينـــــــك
يبني خلـــّي عيناي == تنهــــل من جبينك
شلـــّي إبدنيتي هاي == من خلصـت سنينك
بعدك مظلمه الدار === وإبگلبي لهب نار
يوليـــدي يجســـّام === وفـــّيني يجســـّام
ـــــــــــــــــ
مع تحيات شاعر اهل البيت / جابر النجفي

















(حفيدة موسـى ابن جعفر)]
#قصائد_شهادة_القاسم


#نزلة

شــوف ياليث النزل للحومة
ابجفه أجـــال الكفرمحتومة
.......
غضب صال وزلزل بوادي الطفوف
عيـــونه عالحسين وبسيفه يشــوف
كبـــال ســيفه دنكــت كــل الــسيوف
يقسم أبعبـــاس مكطـــوع الجفـــوف
الـــيوم يسكي كـــربلة مـن دمـــومة
......
كـــلهـم انـــه القــاسم ونجل الحسن
وانه ابن حـــيدر عــلي الرد الزمــن
مــا تهمني خيـــولــكم خــلهن يـجـن
انـــه مــن عمي تـــرى مـــأخــذ إذن
تنعــرف ضــربــاتي لـــن مختــــومة
.....
مــــا يهــمه الجيــش كــله والشسع
اعـــزل يقــــاتـل ومـــا لابـــس درع
ومــثــل الأكـــبربالحرب مــا ينجرع
أي وحـق حــيدر علي وكسـر الضلع
لــــوحه بيـــده كربــلة ومــرســـومة
......
صاح بيهم قـــاســم وعنده الجـــواب
هــاي ساعة من الــزمن قبل المصاب
بيــدي اراويـكـم انـه فــنــون العــذاب
أيسح دمكم عـالـثرة يرفـــضه التـراب
وانـــه قـــاســم سيـفي هــاذه يـــومة
......
صفــرت الــدنية ونــزل بيهه الظلام
أبعمر جاسم هــاي لحظــات الخــتام
ونـــت ونـــاحت على جسمه الحمام
صاح يـــا عــمـي ألك مــني الــسلام
والوصية من الحسن مضمومة
.....
الشاعر
أياد الفرح التميمي


القصائد جمعت من قنوات وكروبات مؤسسة منبريون
ننصحك بتحميل تطبيق قصائد حسينية مكتوبة فهو يحتوي على اكثر من 10الاف قصيدة مكتوبة يمكنك تحميله من هنا
في هذا المقال جمعنا لكم 50 قصيدة حسينية مكتوبة نأمل ان نكون قد وفقنا لخدمتكم

الجزء الاول

السابق
نعي وداع زينب للحسين مكتوب
التالي
قصائد حسينية مكتوبة نزلات 50 قصيدة
البحث عن...
البحث عن...

أحدث المقالات

لطميات مكتوبة لمحرم الحرام – قصائد حسينيه مكتوبه 50
قصائد حسينية مكتوبة لشهر محرم
نعي مكتوب عن حبيب بن مظاهر
لطميات نسائية مكتوبة
قصائد حسينية مكتوبة نزلات 100 قصيدة
قصائد حسينية مكتوبة
قصائد نسائية مكتوبة
نعي مكتوب
Neve | مشغل بواسطة WordPress