اعراف العشائر

#الاعراف .. العشائرية !!
-قبل فترة شخص من معارفي عنده دكتوراه بالهندسة الميكانيكية ( يعني مفيد بالمجتمع ) ، المهم هذا الشخص جان رايح بفاتحة حتى يؤدي الواجب الاجتماعي المطلوب منه ، قدموله فنجان كهوة ، شربه ورجعه لأبو الكهوة باليد اليسرى (سهوا ) ..
-وبعدين شصار ؟ ليش سكتت ؟
-والله كلما أتذكر هذا الموقف انقهر كلش ، يله المهم : ابو الكهوة ذب كوامة ع الدكتور واقسم انو اذا مامشه عليه راح يراوي الأمهات شتجيب ..
-صدك الامهات شتجيب ؟
-ولك مو هذا موضوعنه ، المهم ساعتهه اعتذر الدكتور من الكهوجي وبينله انو ماجان قاصد وانو الأمر حدث سهوا ..
-والكهوجي قبل اعتذار الدكتور ؟
-ماقبل اعتذاره ، وطالبه مرة ثانية بأن يمشي عليه ، وعندما رفض الدكتور ان يمشي على الكهوجي واكتفى بالاعتذار المباشر منه ، حدثت الكارثة !
-ياستار ! شنو اللي صار ؟
-خابر الكهوجي إخوته وعمامه وفزعهم لتأديب الدكتور المسكين ، فماكان من اقرباءه الا التلبية لنداء "الواجب" العشائري ..
-وشسووا أقرباء الكهوجي ؟
-انتظروا الدكتور إلى أن خرج من الفاتحة ، والتمو عليه وضربوه بالقامات والسجاجين ، مما أدى إلى حدوث نزيف داخلي حاد في جمجمته ، توفي على اثره بعد يومين في المستشفى !!
-السؤال اللي يطرح نفسه ويتمرغل بالكاع : هل كان يجب على هذا الدكتور المسكين التفرغ لدراسته والتركيز على عمله خدمة للمجتمع والإنسانية ؟ ام كان يجب عليه التركيز والبحث والاستقصاء عن كون فنجان الكهوة يجب أن يرجع إلى الكهوجي باليد اليسرى ام اليمنى ؟!