20 دارميات الدار-مؤلمه!بقلم حسين الساعدي

20 دارميات الدار-مؤلمه!بقلم حسين الساعدي


1
زيديني بالدمعات للدمعهَ محتاز
ورجعي صدى الأهات يادار الاعزاز

----

2
بلكت نسوا تصوير فوك الحياطين!
الدار المشوا طبيت والدمعه بالعين

لا

لا ما نسوا تصوير كلها خذوهه
يالساعدي الحيطان مثلك سبوهه

----

3
ناحت ابوسط الدار روحي ابولمهه
وبعتبة الماشين رادتني اطمهه

---
4

ابابج لاضل ناطور وافني شبابي
يادار أشمن بيج ريحة احبابي

----

5
عنج مشوا يا دار وبهل مسيه
خل نكعد أنه اوياج نبجي سويه

---

6

مسكينه بس اتنوح منتظره غياب
أفكدهه والكَه الروح يم عتبة الباب

-----

7

خل اليلوم ايلوم مجبور أمر بيج
ويوميه بالدمعات يادار أواسيج

---

8

مثل الطيور اتحوم روحي اعله دارك
وبكًلبي شبت نار مر طفي نارك

----

9
عيني العمه إولتشوف دارك خليه
من غربت لليوم شمسوي بيه

----

10

اصرخ ابنص الدار يرجع صداهه
اتجاوبني بس الموت روحك دواهه

-----

11

وَدعهن الضحكات وبداره ضمها
يا ضحكته الهل يوم واسمع نغمها

---

12
يوم المشوا يا دار خلوني مجنون
وحجايه للعذال ويه اليلومون
----
13

زارع ابابج عين لو للمنيه
وانتظر هلبت يوم ردوا عليه

----
14
دَعميهن إوترتاح شلك بالعيون!!
يالساعدي الماشين ما ظن يرجعون

نار الحطب بالماي هم تطفى وتروح
بس نار الفراكَــ شلون يلماخذ الروح

•••

كون القلب بيه باب ينفك تشوفة... لو شفت غيرك بيه حقك تعوفة

•••

وين اليداوي الروح شكه الوكت شك
بلكي على ايده تتوب وما بعد تعشك

•••
كون من اموت يصير لحدي ويه لحدك
بس يمشي الدفان أكعد وأكعدك

•••

سبحانه من سـواك نص وجهك إعيــون
إزغيــر سبيــت النـاس من تكبـر شلون

•••

حسبالك اني انساك و أعشكلي ثاني؟
لك انـت الكـبد و الروح يعني انتـه انــي

•••
اتمنى هسـه الكاك واتمنى اشوفك
واقسم قسم للموت ما بعد اعوفك

•••

تدر شعمل فركاك اشسوة بية
ظل الكلب والعين يبجن سوية

•••


مو بيــــــدي ياهل الناس كلبي هواها
والجرح عيــــــب يطيب الا بدواها


•••



هلكد حلا حط بيك سبحان قادر
بس الحلك موضوع يترس دفاتر


•••



من كلشي اغار عليك ويغثني كل شي
كسر بجمع ما أريـــــد وي غيري تحجي