شعراء الحي في واسط

جلوسه اعله الارائك والنمارق
وحرير الحور لبسه والنمارق
يحن للغير كلبــــه والنمــــارق
وهو يدري بهواه اشعمل بيـــه

الشاعر محمد المهيدي

نظل نريه المحال احنه ونصباي
انخفض عزمي گبل حيلي ونصباي
ابصباهه الناس تستانس ونصباي
گظيته بكـــــــــدر وهمـــوم واذيـــه

الشاعر سالم الدباغ

ترف گلي اشتبي من الزيج لشتاك
اتگفظ مستعد بالصيف لشتاك
وحگ من عزل بترتيب لشتاك
ارگدت لشتي بهواك شلون بيه

الشاعر عليوي الغافل

كل مغرم گوه بعزمه وانه راك
اهلكت ما عاد اشوفنك ونه اراك
شرارك يجـدح بگلبــي ونـه اراك
لعد غيري ضياهه وحرهه اليـــه

الشاعر جواد جعفر السكر

يحــــادي الضعن بالله عليك تنواي
رحت عنــــي لـــوين تريد تنواي
اگلة اكرب يكلـــــي ليك تنــــواي
بسنه خدي وتظل اتلـــــوم بيـــــه

الشاعر عبد منخي

الشرف من دور اهلنه ماسكنه
اوغير اوطان عزنه ما سكنه
يجــــي الابلد يهيج ماسكنـــــه
بثنـــايانه ويكول الدار اليــــه

الشاعر غازي حجيل

عجب خلخال ساكك مايرنش
جبح ودموع عينك مايرنش
يرن منك مصايب مايرنش
كرهتك لوحياة تصير اليه

الشاعر جميل افندي الواسطي

لفة ولفي اليعاتبني واعتبـه
بهدوة ولا الي واشي وعتبــه
يعتني وانتحب وابچي واعتبه
بچه ودموعنه صبن سويه

الشاعر عبيد ياسين

عيونه گبل اشافة شتمنــــي
وعگلي الچان ثابت شتمني
انهجم بيتچ يروحي شتمني
تمنيت الذي يصعب عليــه

الشاعر صادق تويه
لمن ياعين هليتـــــي وسلتـــي
راح الچان امل روحي وسلتي
غزوني وفرهدوا عنبي وسلتي
وذبــــوا چتلت الناطور بيــــه

الشيخ الشاعر عبد الله الحاشي
امر بالدار واسمع بها حنه
ضلوعي من جفاكم بيها حنه
حسب ضنك جفوفي بيها حنه
مسحت الدمع دم واثر بديه

الشاعر هاشم الحاشوش

وحك صورة تبارك وتلاها
نار الكلب تسعر وتلاها
يبد الذات تلعب وتلاها
عني ولا دريت شصار بيه

الشاعر هاشم الدريعي

ترف شغله شعز عندي منشفاك
اموت اويحتيي عودي منشفاك
لون اسمع حچـي يغثني منشفاك
مزاح اتصوره مو غيض اليــه

الشاعر محمد الغالي

ابنده البورود وجناته وردني
خذاني الشوگ بوداده وردنــي
بيدي اسحبت دمعاته وردني
اوعله ايدي غفه اومابين اديـه